ఆర్థిక సంక్షోభంలో ఉన్న పాకిస్థాన్‌కు ఐఎంఎఫ్ భారీ ఊరట

తీవ్ర ఆర్థిక సంక్షోభంలో ఉన్న పొరుగు దేశం పాకిస్థాన్‌కు అంతర్జాతీయ ద్రవ్య నిధి (ఐఎంఎఫ్) నుంచి భారీ ఊరట లభించింది. కీలక కార్యక్రమాల సమీక్షలను పూర్తి చేసిన అనంతరం సుమారు 1.3 బిలియన్ డాలర్ల (సుమారు రూ. 12,275 కోట్లు) నిధులను విడుదల చేసేందుకు ఐఎంఎఫ్ ఎగ్జిక్యూటివ్ బోర్డు ఆమోదం తెలిపింది.

ఎక్స్‌టెండెడ్ ఫండ్ ఫెసిలిటీ (ఈఎఫ్ఎఫ్) కింద మూడో సమీక్ష, రెసిలెన్స్ అండ్ సస్టెయినబిలిటీ ఫెసిలిటీ (ఆర్ఎస్ఎఫ్) కింద రెండో సమీక్షలను పూర్తి చేయడంతో ఈ నిర్ణయం తీసుకున్నారు. దీని ద్వారా తక్షణమే ఈఎఫ్ఎఫ్ కింద 1.1 బిలియన్ డాలర్లు, ఆర్ఎస్ఎఫ్ కింద 220 మిలియన్ డాలర్లు పాకిస్థాన్‌కు అందనున్నాయి. దీంతో ఈ రెండు కార్యక్రమాల కింద పాక్‌కు ఇప్పటివరకు అందిన మొత్తం నిధులు 4.8 బిలియన్ డాలర్లకు చేరాయి.

ప‌శ్చిమాసియాలో యుద్ధ వాతావరణం ఉన్నప్పటికీ, పాకిస్థాన్ కార్యక్రమాలను పటిష్ఠంగా అమలు చేస్తోందని ఐఎంఎఫ్ ప్రశంసించింది. దీనివల్ల ఆర్థిక స్థిరత్వం కొనసాగుతోందని, బాహ్య ఆర్థిక పరిస్థితులు మెరుగుపడ్డాయని పేర్కొంది.

ఐఎంఎఫ్ డిప్యూటీ మేనేజింగ్ డైరెక్టర్ నైజెల్ క్లార్క్ మాట్లాడుతూ.. "పాకిస్థాన్ ఆర్థిక పనితీరు బలంగా ఉంది. విదేశీ మారక నిల్వలు 2025 జూన్‌లో 14.5 బిలియన్ డాలర్లు ఉండగా, డిసెంబర్ నాటికి 16 బిలియన్ డాలర్లకు పెరిగాయి" అని తెలిపారు. అయితే, అంతర్జాతీయంగా కమోడిటీ ధరలు పెరగడంతో దేశీయంగా ఇంధన ధరలు పెరిగి ద్రవ్యోల్బణం ఒకింత పెరిగిందని, బాహ్యంగా సవాళ్లు ఉన్నాయని హెచ్చరించారు. ఆర్థిక క్రమశిక్షణ కొనసాగించాలని, ప్రభుత్వ రంగ సంస్థల ప్రైవేటీకరణ, అవినీతి నిరోధక చర్యలు వంటి లోతైన నిర్మాణాత్మక సంస్కరణలు చేపట్టాలని ఐఎంఎఫ్ నొక్కి చెప్పింది.